Motorista, natay iti aksidente

CERVANTES, Ilocos Sur – Saanen a naiyabot ti biag ti maysa a motorista iti ospital kalpasan a nadesgrasia iti Barangay San Juan ditoy nga ili idi malem ti Septiembre 13.

Nabigbig ti motorista a ni Arsenio Damucay y Lino, 59, mannalon, ken residente iti Barangay Comillas South, ditoy nga ili.

Daldaliasaten ni Damucay ti kalsada a Cervantes-Tagudin iti agpadaya a direksion idi napukawna ti kontrolna iti manibela ti motorsiklona ket nadungparna ti balangan iti igid ti kalsada a nagsagrapanna kadagiti nakaro a sugatna.

Naitaray ni Damucay iti Bessang Pass Memorial Hospital ngem indeklara ti doktor a nangasikaso kenkuana nga awanen ti biagna.#