Footer

Motorista, natay iti aksidente

STO. DOMINGO, Ilocos Sur – Natay ti maysa a motorista kalpasan a naikras iti provincial road a sakup ti Barangay Cabaritan ditoy nga ili idi malem ti Disiembre 26.

Nabigbig ti biktima a ni Dexter Tabil y Constantino, 33, baro, ken residente iti Barangay Pussuac, ditoy nga ili.

Segun iti report, idi agarup 1:51 ti malem ti nasao a petsa, agpalaud a direksion ti Dio 2 scooter a minaneho ni Tabil ket iti nagpikuran ti Barangay Cabaritan, napukawna ti kontrolna iti manibela ket naikras a nagsagrapanna kadagiti sugat.

Mapapati a napardas ti panagpataray ni Tabil.

Naitaray ti biktima iti Metro Vigan Cooperative Hospital ngem pimmusay bayat ti pannakaagasna.#