Motorista, natay iti aksidente

STA. MARIA, Ilocos Sur – Natay ti maysa a motorista kalpasan a dinungpar ti luganna ti maysa nga alad sadiay Barangay Sumagui, ditoy nga ili idi Abril 5.

Naideklara a dead on arrival iti Narvacan District Hospital ni Jomer Reyes Almazan, 21, baro, ken residente iti Barangay Balugang, Burgos, Ilocos Sur, gapu kadagiti nakaro a sugatna iti ulona ken nadumaduma a paset ti bagina.

Iti panagimbestiga dagiti polis, agdaldaliasat ni Almazan iti nadakamat a barangay idi agarup alas dies ti rabii ti nadakamat nga aldaw idi napukawna ti kontrolna iti Honda XRM a motorsiklo a nagresulta iti panangdungparna iti alad iti lauden nga abaga ti kalsada.

Nakaro dagiti sinagrap ti biktima a dunor gapu iti kapigsa ti pannakaidungpar ti luganna iti alad.#