Motorista, natay iti aksidente ti lugan

VIGAN CITY – Naideklara nga awanen ti biag ti motorista iti ospital a nakaitarayanna gapu iti pannakaikras ti luganna iti kalsada sadiay Nagsangalan, ditoy siudad idi sardam ti Hunio 28.

Naireport a natay a naidanon iti Lahoz Clinic and Hospital ni Jaime Florendo y Jimenez, 31, baro, ken residente iti Barangay Purok a Dakkel, Vigan gapu kadagiti grabe a sugatna iti nadumaduma a paset ti bagina.

Iti panagimbestiga dagiti polis, nakainom ti biktima ket mapapati a napaspas ti panagpatarayna a puon ti pannakaikrasna iti abaga ti sabali a linia ti kalsada.

Intaray dagiti barangay tanod ni Florendo ngem indeklara ni Dr. Esperanza Lahoz a natayen ti biktima gapu iti grabe a sugatna iti ulona.

Awan ti aruat a helmet ti biktima idi maikras.#