Motorista, natay, kinalubbonna, nasugsugatan iti pannungpar

TAGUDIN, Ilocos Sur – Natay ti maysa a motorista ken nasugsugatan ti insakayna gapu iti pannakidinnungpar ti luganda iti maysa a bus iti national highway iti Barangay Bitalag ditoy nga ili idi malem ti Hulio 25.

Naitaray da Renato Inigo Manzano, 40, naasawaan, ken residente iti Lintik, Banayoyo, Ilocos Sur ken ti  kinasakayna a ni Oscar Gambon, 37, residente met laeng iti nasao a barangay, iti Tagudin General Hospital ngem naideklara ni Manzano nga awanen ti biagna.

Iti panagimbestiga dagiti polis, agpaamianan ti Florida Bus a minaneho ni Joy Gorospe Raquepo, 34, naasawaan, ken residente iti Barangay Immayos Norte, San Juan, Ilocos Sur idi kellaat a nagsikko nga agpakannigid ti agpaabagatan a TMX motorcycle a minaneho ni Manzano ket nupay nagbusina ni Gorospe ken pinadasna a lisian ti motorsiklo, nagdinnungparda iti tengnga a paset ti agpaamianan a lane.

Naisagad ni Manzano iti sangapulo a metro manipud iti point of impact a nagsagrapanna kadagiti dunor iti ulo ken nadumaduma a paset ti bagina.

Naikustodia ti drayber ti bus ket iti pannakaisurat daytoy, maisagsaganan ti maipila a kaso maikontra kenkuana.#