Motorista natay, nasugatan kaduana, iti aksidente

STA. MARIA, Ilocos Sur –  Maysa ti natay idinto a nakaro ti sugat ti kaduana idi naidungpar ti naglugananda a traysikel iti maysa a trak iti barangay Laslasong West, iti daytoy nga ili.

Nainaganan ti natay a ni Joemar Cabalteja, 29, residente iti barangay Tangadan, San Quintin, Abra ken ti kaduana a nasugatan a  ni Ernesto Dizon, 21, kalugaranna.

Iti imbestigasion ti polis, naammuan a linabsan dagiti biktima a nakalugan iti Honda TMX 155, addaan iti plaka ZE-3743 ti sabali a traysikel ngem sumungad met ti  Isuzu truck, addaan iti plaka UBV-758 ken minaneho ni Jomy Torella, 39, ken residente iti barangay Pangatian, Cabanatuan City ket nagdinnungparda.

Natay a dagus ti biktima gapu iti grabe a sugatna. Naitaray ti kaduana iti Central Ilocos Sur District Hospital.#