Motorista, natiliwan agikut iti paltog, droga

STA. CATALINA, Ilocos Sur – Dua a kaso ti manamnama a maipila kontra iti daytoy a drug personality gapu iti pannakatiliwna nga agikut iti maiparparit a droga ken kolorum a paltog iti checkpoint nga impasdek dagiti polis iti Barangay Pangada ditoy nga ili idi rabii ti Septiembre 17.

Inaresto dagiti polis kalpasan a nakumpiskaanda iti mapapati a shabu ken homemade a cal. 22 revolver ni Gilbert Rabino y Rabbon, 41, naasawaan, residente iti Barangay Cabittaogan, Sta. Catalina bayat ti inwayatda a checkpoint operation iti nadakamat a barangay idi agarup 11:30 ti parbangon ti Septiembre 17.

Sakbayna, pinara dagiti polis ni Rabino agsipud ta mapapati a dina makontrol ti motorsiklona a Racal.

Nagsuspetsa dagiti polis idi awan ti maipakita ni Rabino a lisensiana, saan a makaidna ken nagtigerger ti timekna idi pagsaludsodan dagiti polis.
Kiniddaw dagiti polis a luktan ni Rabino ti compartment ti luganna ngem saan nga intulok daytoy.

Gapu itoy, nangayab dagiti polis iti dua a barangay tanod ken pannakabagi ti DOJ tapno imatanganda ti pannakalukat ti compartment.
Boluntario met laeng a linuktan ni Rabino ti compartment ket ditoy a naduktalan dagiti polis ti maysa a homemade cal. 22 revolver nga awanan iti marka ken nagkarga iti kapsula, maysa a heat sealed plastic sachet a naglaon iti mapapati a shabu, ken 4 a narolio nga aluminum foil.

Nakalista ni Rabino a top 5 iti drug watch list ti kapolisan ditoy.

Kabayatanna, droga, balbala ken kuarta ti nasukainan dagiti polis bayat ti panagsukisokda iti balay ti maysa a mannalon sadiay Barangay Bulag East, Bantay, Ilocos Sur idi rabii ti Septiembre 15.

Nakasamsam dagiti nagtitipon nga elemento ti kapolisan a pakaibilangan ti Bantay MPS, PAIDSOTG, ISUR PPO, PIB, ken PDEA ISSET iti balay ni Fernando Piano y Bosque, 34, baro, ken residente iti nadakamat a barangay, iti tallo a heat sealed plastic sachet a nagkarga iti mapapati a shabu, 25 a bala ti cal. 45, P23,500.0 a cash money iti nadumaduma a denominasion, P880.00 a sensilio, selpon a Samsung, ken 4 a lighter.

Naipaima iti crime laboratory dagiti nasamsam a mapapati a droga para iti pannakaamirisda idinto a birbiroken dagiti polis ti suspek.#