Motorsiklo a naiparking iti abay ti simbaan, natakaw

VIGAN CITY – Natakaw ti motorsiklo ti maysa nga empleado ditoy siudad nga imparkingna iti asideg ti simbaan a nakimisaanna idi agsapa ti Enero 22.

Nagreport ni Wilfredo Cabalteja y Atacup, 56, naasawaan, empleado, ken residente iti Barangay Tamag ditoy siudad a tinakaw dagiti di nabigbig a mannanakaw ti nangisit a motorsiklona a Honda XRM,  nga imparkingna iti sanguanan ti parish office iti abay ti Katedral ti Vigan idi napan nakimisa iti dayta a bigat.

Segun iti biktima, awanen ti motorsiklona iti nangiparkinganna idi agsubli kalpasan ti misa.

Nagsawar ti biktima ngem idi dina makita ti luganna, impulongnan iti polis tapno mailanad iti blotter ti pannakatakawna.#