Motorsiklo dagiti polis, nainbolbar iti aksidente

BANTAY, Ilocos Sur – Sumangbay latta ti aksidente, uray polis dagiti agmaneho ken ingget tanang ti panagpatarayda.

Napasamak daytoy kada PO2 Jonathan Bajet y Turcato, 32, naasawaan, naka-assigned iti Santa police station, ken ni PO2 Eddie Rigunay y Romero, 36, naasawaan, naka-assigned iti San Vicente police station, bayat ti panagdaliasatda iti national highway a sakup ti Barangay Cabaroan ditoy nga ili idi agsapa ti Abril 5.

Agsarsaruno nga agpadaya a direksion da Bajet a nagmaneho iti Yamaha Sport ken ni Rigunay a nagmaneho iti Honda Wave, ket iti pagkurbaan iti Barangay Cabaroan, kellaat a nagsardeng ti motorsiklo a sarsarunuen ni Bajet a puon ti panagpreno ti polis ngem gapu ta nabasa ti kalsada, naigalis ti Yamaha Sport. Nagpreno met ni Rigunay tapno dina madungpar ti Yamaha Sport ngem kaskasdi a naikrasda.

Nagsagrap iti garadgad da Rigunay agraman dagiti nakikalubbon kadakuada a polis met laeng ngem naibati ni Bajet iti Metro Vigan Cooperative Hospital gapu iti limteg a makannawan a pungupunguanna ken garumiadna.#