Motorsiklo dimmungpar iti 18 wheeler truck,

SAN ESTEBAN, Ilocos Sur –  Mapapati a saan a nakita ti biktima ti signal ken ti improvised nga early warning device a naikabil iti sakbay ti nakaparking a trak isu a nadungparna daytoy a puon ti nakatayanna ken nakadundunoran ti inlubbonna.

Nagresponde dagiti polis iti sanguanan ti National Grid Corporation of the Philippines a masarakan iti Barangay San Pablo ditoy nga ili idi nakaawatda iti tawag manipud ken ni Engineer Joseph Fontanillo Arreola a nangipakaammuanna iti napasamak nga aksidente iti nasao a lugar idi agarup 11:55 ti rabii ti Abril 10.

Iti panagimbestiga dagiti polis, naammuan a dinungpar ti motorsiklo a minaneho ni Freddie Mark Garces y Collado, 26, naasawaan, ken residente iti Barangay San Jose, Candon City, ti 18 wheeler truck a nakaparking iti abaga ti kalsada.

Segun ken ni Roderick Gutierrez Corpuz, 31, drayber ti truck, naasawaan ken residente iti Barangay San Vicente, San Jacinto, Pangasinan, manarimaan ti panangsukatna iti naeppes a goma ti trailer ti truck idi kellaat lattan a dinungpar ti motorsiklo ti makannigid a kutit ti lugan a puon ti nakaikrasan daytoy ken nakatayan a dagus ti nagmaneho a ni Garces.

Nakaro met ti dunor ti nadumaduma a paset ti bagina ti sinagrap ni Erick Gadut y Arellano, 19, kinalubbon ni Garces iti motorsiklo, baro, ken residente iti Barangay Bagani Tucgo, Candon City ket intaray dagiti nagresponde a polis iti Guerrero Hospital iti Sta. Maria, Ilocos Sur para iti pannakaagasna.

Adda inkabil da Gutierrez nga improvised early warning device ken naka-flash signal ti truck ngem mapapati a saan a nakita a dagus dagiti naglugan iti motorsiklo. Awan ti aruat dagiti nakamotorsiklo a helmet. Nakaro ti dadael ti luganda.

Naipan ti drayber ti truck ken ti katulongna iti police station ditoy nga ili para iti ad-adu pay a pannakapalutpotda.#