Motorsiklo, dinungpar ti traysikel, van

SAN JUAN, Ilocos Sur – Malas daytoy a motorista ta dua a lugan ti nangdungpar ti motorsiklona iti kaaldawan ti Paskua.

Naitaray iti Pira Clinic and Hospital, Cabugao, Ilocos Sur ni Leonard Manuel y Bersamela, 19, natibo iti Pudtol, Apayao ngem agdama nga agnaed iti Barangay Cabaritan, Sto. Domingo, Ilocos Sur tapno maagasan dagiti dunorna gapu iti panangdungpar iti traysikel ken Mercedes Benz MB 100 van ti Honda Wave 100 a motorsiklona idi malem ti Disiembre 25 iti national highway iti sanguanan ti tiendaan publiko ditoy.

Iti inbestigasion, agpaamianan ti motorsiklo a minaneho ni Bersamela idi dinungpar ti traysikel a minaneho ni Marlou Vintero y Longakit, 18, ken residente ifi Barangay Resurreccion, San Juan, Ilocos Sur a naggapu iti tiendaan sa dinungpar ti van a minaneho ni Crisante Ancheta y Corpuz, 33, residente iti Barangay 57, Pila, Laoag City.

Nadadael ti kannawan a bakrang ti motorsiklo, idinto a nadadael met ti sungo ti traysikel ken nakuppil ti sungo ti van.#