Motorsiklo, dump truck, nagdinnungpar

MAGSINGAL, Ilocos Sur – Nasugsugatan ti dua a nagkalugan iti motorsiklo idi nagdinnungpar ti luganda ken iti maysa a dump truck.

Nadunor da Dennis Tacuycuy, 24, baro, ken Robert Tacuycuy, 29, naasawaan, agpada a residente iti Barangay Mansante ditoy nga ili. Saan a naan-ano ti drayber ti dump truck, ni Victorio Barbado, 49, naasawaan, residente iti Barangay San Ramon ditoy met laeng nga ili.

Segun iti report, sumrek koma ti dump truck iti Barangay Caraisan ngem nakasabatna ti motorsiklo ket nagdinnungparda.

Naitaray dagiti dua a Tacuycuy iti Magsingal District Hospital sada naiyalis iti Metro Vigan Cooperative Hospital iti Bantay, Ilocos Sur.#