Motorsiklo, intaray nagpammarang a gumatang

STA. LUCIA, Ilocos Sur – Impambar daytoy suspek nga i-test drive ti motorsiklo a mapapati a kayatna a gatangen ngem saanna metten nga insubli.

Gapu itoy, inreport ni Josie Yulo, residente iti Barangay San Juan ditoy, iti polis ni Crisanto Naungayan, residente iti Barangay Tablac, Candon City, tapno mapasublina ti motorsiklona.

Segun iti biktima, nagpammarang ni Naungayan a manggatang iti XRM a motorsiklona ket imbagana a padasenna nga i-road test ti lugan no nasayaat met laeng ti motorna ket napalabasen ti maysa nga aldaw, di pay insubli ti suspek ti nasao a lugan.

Kinuna ti biktima a nagtalek iti suspek agsipud ta kabagianna pay laeng ti ama daytoy.#