Motorsiklo, intaray nagpammarang a kustomer

CANDON CITY – Sabsabali ti wagas daytoy a lalaki nga agtakaw ta nagpammarang a gumatang iti itarayna a motorsiklo.

Nagreport iti polis ni Ferdinand Bernal y Ramos, 50, naasawaan, ken residente iti Barangay Tablac, ditoy siudad nga intaray ti maysa a Raymark ti motorsiklona idi sardam ti Hunio 2.

Segun ken ni Bernal, nagpammarang ti suspek a gumatang iti motorsiklo ket kiniddaw daytoy a padasenna nga irikos ti lugan tapno ammuenna kano no nasayaat ti makinana.

Impalubos ni Bernal ket sinakayan ti suspek sana pinataray nga inyadayo.
Kalpasan ti maysa nga oras a di pay insubli ti suspek ti motorsiklo, inreport ni Bernal ti insidente iti polis.

Iti pannakaisurat daytoy, di pay natuntonan ti polis ti yan ti lugan ken ti suspek.#