Motorsiklo, naidungpar iti alad, nagmaneho, nayospital

SAN ESTEBAN, Ilocos Sur – Nakaro a nasugatan ti maysa a motorista idi naidungpar ti luganna iti alad idiay Barangay Poblacion, San Esteban, idi Nobiembre 6.

Naitaray iti ospital ni John Eric Arreola, 18, residente iti Poblacion sur, Santiago, Ilocos Sur gapu kadagiti sinagrapna a sugat iti bagina maigapu iti pannakaidungpar ti motorsiklona a Motostar Zest iti landok nga alad iti igid ti kalsada a sakup ti Barangay Poblacion ditoy.

Iti panagimbestiga dagiti polis, naammuan nga agpaabagatan ti motorsiklo a minaneho ni Arreola idi kellaat a bimtak ti akinsango a pilid ti luganna ket saanna a nakontrol ti manibela a nagtungpal iti pannakaidungparna iti alad.#