Motorsiklo, naikras; nagmaneho, natay

SALCEDO, Ilocos Sur – Saanen a naidanon ti biag ti maysa a motorista iti ospital gapu iti pannakaikras ti motorsiklona iti maysa a barangay ditoy nga ili idi rabii ti Nobiembre 10.

Naideklara nga awanen ti biag ni Celso Cabaya y Cortez, 49, naasawaan, tricycle driver, ken residente iti Barangay Calangcausan ditoy nga ili idi maidanon iti Salcedo District Hospital gapu iti sinagrapna a dunor iti ulona maigapu iti pannakaikrasna.

Segun iti report manipud iti polis ditoy, agpalaud a direksion ti nangisit a Rusi a motorsiklo a minaneho ni Cabaya ket idi makadanonda iti nadakamat a lugar, napukawna ti kontrolna iti manibela a puon ti pannakaikras ken pannakabalintuag ti luganda.

Kas resulta, naipuruak ni Cabaya ken ti kasakayna a ni Roberto Lang-oey, Jr., 39, naasawaan, mannalon, ken kalugaranna, ken naitupa ti ulo ni Cabaya iti kongkreto nga alad.

Mapapati a napegges ti panagpataray ni Cabaya.#