Motorsiklo, nailemmeng iti kasamekan

TAGUDIN, Ilocos Sur – Maysa a motorsiklo ti naireport iti polis a nailemmeng iti kabakiran a paset ti Barangay Ag-aguman ditoy nga ili idi rabii ti Hulio 7.

Nakaawat ti police station ditoy iti tawag manipud ken ni Ag-aguman Barangay Captain Arsenio Quitoriano a maysa a nangisit a motorsiklo a Kymco ti nasukalan a nailemmeng iti nasamek a paset ti kabakiran iti barangayda.

Segun iti report, nakita ti maysa nga Ireneo Calibuso, residente met laeng iti nadakamat a barangay, ti motorsiklo a nagaburan kadagiti ruruot ket impakaammona daytoy ken ni Quitoriano a nangitawag met iti polis.

Narekobre dagiti nagresponde a polis dagiti nadumaduma a mechanical tools, flashlight, maysa paris a sinelas, plaka ti motorsiklo a TW 7365 ken kalub ti motorsiklo.

Mapapati a natakaw ti nasao a motorsiklo ket pinanggep a rangkayen dagiti nagtakaw.#