Motorsiklo, natakaw

VIGAN CITY – Maysa a motorsiklo ti naireport a natakaw iti sango ti maysa a bangko ditoy siudad idi malem ti Disiembre 22.

Inreport ni Marilyn Agoto Paiste, 38, naasawaan, ken residente iti Barangay Tay-ac, Bantay, Ilocos Sur, a natakaw ti motorsiklo a Yamaha Mio Soul a nairehistro ken ni Wilfredo Paiste Patubo nga imparkingna idi agarup 1:30 ti malem iti sanguanan ti PSBank sadiay Plaridel Street, Barangay 1 ditoy siudad sa napan iti Philippine National Bank.

Naduktalanna laengen nga awan ti motorsiklo idi nagsubli idi agarup 2:30 iti dayta met laeng a malem.

Sinapul ni Agoto ti motorsiklo ngem saannan a nabirokan isu nga inreportna iti polis.

Naipakaammo metten ti kapolisan ti pannakatakaw ti nasao a motorsiklo kadagiti kabangibangna a police station.#