Motorsiklo, natakaw

SINAIT, Ilocos Sur – Maysa a motorsiklo ti naireport a natakaw iti nakaiparkinganna sadiay Barangay Ballaigui, ditoy nga ili idi rabii ti Mayo 13.

Inreport ni Reynold Ibuos y Ramirez, 25, naasawaan, ken residente iti Barangay Katipunan, Sinait a natakaw ti motorsiklona a Euro nga imparkingna iti Barangay Ballaigui, Sinait idi agarup 8:45 ti rabii ti Mayo 13.

Kinuna ni Ibuos nga imparkingna ti motorsiklona iti Aglipay Street iti makannawan a paset ti Mang Jhe Carinderia ngem idi nagsubli iti agarup 9:00 iti dayta met la rabii, awanen ti motorsiklo iti nakaiparkinganna.

Saan nga inuksot ni Ibuos ti tulbek iti ignition idi pinanawanna ti luganna.

Iti pannakaisurat daytoy, di pay ammo ti nangtakaw iti motorsiklo ni Ibuos.#