Motorsiklo, natakaw

VIGAN CITY – Natakaw ti motorsiklo nga imparking ti maysa a baro iti Plaza Burgos ditoy idi sardam ti Disiembre 9.

Nagpulong iti polis ni Mark Jerwin Javier y Longino, 17, baro, ken residente iti Barangay San Julian Sur ditoy siudad a natakaw ti motorsiklona a Yamaha Mio Scooter, nangisit, awanan iti plate number, nga imparkingna iti abagatan a paset ti Plaza Burgos idi agarup alas 4:00 ti malem ti nadakamat a petsa.

Segun ken ni Javier, awanen ti motorsiklona iti nangiparkinganna idi sublienna kalpasan ti dua nga oras.

Sinapul ti biktima ti motorsiklona ngem saannan a nabirokan isu nga inreportna ti pannakatakaw ti lugan iti police station.

Nagsawar met dagiti polis a kaduada ti biktima ngem kaskasdi a dida nasapulan ti motorsiklo.#