Motorsiklo, natakaw

VIGAN CITY –  Maysa a motorsiklo ti natakaw iti sango ti Video City a masarakan iti Gov. A. Reyes Street, Barangay I, Vigan City idi rabii ti Disiembre 22.

Nagreport ni Marie Arce y Empleo, 14, estudiante, ken residente iti Barangay Capangpangan, ditoy siudad, a natakaw ti motorsiklona a Mio Sporty nga imparkingna iti sango ti Video City idi agarup 7:00 ti sardam ti nadakamat a petsa sana pinanawan tapno mapan agbuya iti dancing fountain iti Plaza Salcedo.

Iti sublien ti biktima ti motorsiklona iti agarup 8:20 iti dayta met laeng a rabii, awanen ti motorsiklona iti nangiparkinganna.

Sinapul ti biktima ti luganna ket idi saannan a mabirokan, inreportnan iti polis.#