Motorsiklo, natakaw iti ruar ti pagadalan

MAGSINGAL, Ilocos Sur – Inreport ti maysa a maestra a natakaw ti motorsiklona a nakaparking iti ruar ti pangisursuruanna a pagadalan idi aldaw ti Oktubre 28.

Segun ken ni Jhimar Jurado y Peredo, 35, naasawaan, maestra ken residente iti Barangay Manzante, ditoy nga ili, natakaw ti motorsiklona a Yamaha Sniper nga imparkingna iti ruar ti St. William Institute babaen dagiti di am-ammo a mannibrong.

Kinuna ni Jurado nga idi agarup alas 8:00 ti bigat ti nadakamat a petsa, imparkingna ti luganna iti ruar ti pagadalan ngem idi sublienna kalpasan ti klasena, awanen daytoy.

Awan ti nakasiput, uray ti guardia ti pagadalan, no asino ti nangitaray iti lugan ti maestra.#