Motorsiklo, natakaw iti sango ti karinderia

CANDON CITY, Ilocos Sur – Matakaw latta ti motorsiklo uray matatao a lugar ken sanguanan pay ti panganan.

Kasta ti napasamak iti Honda TMX a motorsiklo ni Susimo Morqued y Piningo, 41, naasawaan, negosiante, ken residente iti Barangay Calaoa-an ditoy siudad a natakaw iti nagbaetan ti 7:00 ken 9:00 ti bigat ti Hunio 24.

Kinuna ni Morqued nga imparkingna ti motorsiklona iti agarup 7:00 ti bigat iti dayta a petsa iti sango ti Everland Eatery a masarakan iti igid ti national highway ta napan nagluto iti karinderia.

Idi agarup 9:00 ti aldaw, napanna kinita ti motorsiklona ngem awanen daytoy iti nakaiparkinganna.

Segun ken ni Morqued, nalipatanna nga inikkat ti tulbek ti motorsiklona idi simrek iti eatery.#