Footer

Motorsiklo, natakaw iti sanguanan ti simbaan

STA. LUCIA, Ilocos Sur – Saan a pilien dagiti agtatakaw iti lugar a pagtakawanda, uray sanguanan ti simbaan.

Natakaw ti traysikel a  Honda TMX nga imparking ni Randy Duque y Habab, 25, baro, ken residente iti Barangay Conconig West ditoy nga ili, iti sanguanan ti simbaan idi agarup 4:30 ti agsapa ti bigat ti Disiembre 18.

Sinublat ni Duque ti nasao a traysikel a nairehistro iti nagan ti ulitegna a ni Renato Habab y Hagnol, 42, naasawaan, ken residente iti Barangay Conconig ta napan nagatendar iti misa de gallo.

Naduktalan laengen ni Duque nga awanen ti traysikel iti nakaiparkinganna idi malpas ti misa.

Idi naireport ti pannakapukaw ti traysikel, nagsawar dagiti polis ngem awan a nakitada daytoy.

Nangipatulod dagiti polis iti flash alarm kadagiti kabangibangna nga ili para iti pannakarekobre ti traysikel.#