Motorsiklo, natakaw iti tiendaan

VIGAN CITY – Maysa manen a motorsiklo ti naireport a nagpukaw iti nakaiparkinganna iti tiendaan publiko ditoy idi malem ti Oktubre 18.

Nagreport iti polis ni Conrado Mendoza y Alcain, 56, naasawaan, ken residente iti Barangay Boquig, Bantay, Ilocos Sur, a natakaw ti Honda XRM motorcycle nga imparkingna iti center lane ti tiendaan publiko ditoy siudad idi agarup 2:00 ti malem ti nadakamat a petsa.

Segun ken ni Mendoza, pinanawanna ti motorsiklo a nakatunnal ti tulbek iti ignition switch ngem idi agsubli iti 3:15 PM, awanen daytoy iti nakaiparkinganna.

Sinapul ni Mendoza ti lugan ket idi dina mabirokan, inreportnan iti polis.

Nagsawar met dagiti polis ngem saandan a nasapulan ti motorsiklo. Nangipatulodda iti flash alarm kadagiti kabangibang a police stations mainaig iti mapukpukaw a motorsiklo.#