Motorsiklo, natakaw iti videoke bar

CERVANTES, Ilocos Sur – Imparkingna ti motorsiklona idi asideg ti videoke bar sada napan naggiinom ngem idi sublianna kalpasan ti lima nga oras, awanen daytoy.

Inreport ni Arlon Duga-ong y Tampagan, baro, estudiante ken residente iti Barangay San Luis ditoy nga ili, iti polis a napukaw ti motorsiklona nga imparkingna iti asideg ti videoke bar a masarakan iti Alejandrino Street, Barangay Rosario ditoy met laeng nga ili.

Segun ken ni Duga-ong, imparkingna ti motorsiklona a Rusi KR 125 Jumper iti asideg ti videoke idi agarup 12:00 ti tengnga ti aldaw iti nadakamat a petsa sada immuneg nga agkakadua iti bar.

Idi agarup 5:00 ti malem, naduktalan laengen ni Duga-ong nga awanen ti motorsiklona iti nangiparkinganna.
Nangipatulod dagiti polis iti flash alarm kadagiti kaparangetda a police stations para iti pannakasapul iti nasao a motorsiklo ngem negatibo pay ti resultana.#