Motorsiklo, natinnag iti gungugong

SANTA, Ilocos Sur – Maysa ti natay idinto a dua ti nakaro a nasugatan idi natinnag ti motorsikloda iti gungugong sadiay Barangay Cabangaran ditoy nga ili idi rabii ti Oktubre 10.

Naitaray da Gerald Molina y Carpio, 20, awanan asawa; ken Mark Anthony Borje y Bajog, 21, awanan asawa, agpada nga agnaed iti Barangay Banaoang, Santa, iti Gabriela Silang General Hospital ngem saanen a naidanon ni Borje a sibibiag iti ospital.

Naitaray met ni Joel Caspillo y Custodia, 39, nagmaneho iti Mio Sporty motorcycle, residente iti Barangay Namalangan, Santa iti Metro Vigan Cooperative Hospital no sadino a pakaag-agasanna.

Kas maibatay iti report, idi agarup 9:25 ti rabii ti nadakamat a petsa, agpaabagatan a direksion ti motorsiklo a minaneho ni Caspillo idi napukawna ti kontrolna iti manibela ket naitapuak ti lugan iti gungugong nga agarup 6-8 metros ti kaunegna.#