Footer

Motorsiklo, pick-up nagdinnungpar; menor de edad, DOA iti ospital

CANDON CITY – Awanen ti biag ti maysa a menor de edad idi maidanon iti ospital kalpasan nga insagad ti pick-up a nakidinnungpar iti motorsiklona iti aksidente a napasamak iti national highway partikular iti sango ti Centrum Gasoline Station ditoy idi agsapa ti Agosto 24.

Awanen ti biag a naidanon iti Candon City Hospital ti menor de edad a nagmaneho iti Honda Wave 125 a nabigbig iti nagan a John Raven Manzano y Batalla, 15, awanan asawa, out of school youth, ken residente iti Barangay Paras ditoy siudad.

Nayospital met dagiti insakay ti biktima a padana a menor edad a da Charles Orallo y Perez, 15, baro, OSY, residente met laeng iti Barangay Paras, Candon City, Ilocos Sur ken ni Ericson Santiago y Cortez, 12, baro, OSY, residente iti Barangay Oaig Daya, Candon City gapu iti sinagrapda a sugat.

Simmuko iti polis ti drayber ti Mitsubishi Strada GLX pick-up a ni Marlon Diwayan y Bernal, 44, naasawaan, ken residente iti Barangay Poblacion, Tayum, Abra.

Kadua ni Diwayan iti lugan idi mapasamak ti aksidente da Mayor Alejo Siddayao Domingo, residente iti Barangay Tumalib, Licuan-Baay, Abra; Walton Pillando y Castillo, 52; Gilbert Piano y Gaboy, 33; ken Conrado Pascua y Bueno, 53; resi-denteda amin iti Barangay Nalbuan, Licuan-Baay, Abra.

Kas maibatay iti CCTV footage a nainstolar iti Centrum Gasoline Station, agpaabagatan a direksion ti Strada a minaneho ni Diwayan ket inobertekanna ti maysa a traysikel a nakagapu iti panagdinnungparda iti sumungad a motorsiklo a minaneho ni Manzano.

Insagad ti Strada ti motorsiklo iti sumurok-kumurang 14 a metro manipud iti point of impact.

Agpada dagiti dua a lugan a nakaro ti dadaelda. (Tawid News)