Motorsiklo, sinapgid ti dyip

SAN ESTEBAN, Ilocos Sur – Sinapgid ti maysa a dyip ti nakasabatna nga scooter iti kalsada nasional a sakup ti Barangay Bateria ditoy nga ili a puon ti nakadunoran ti nagmaneho iti motorsiklo ken ti kalubbonna.

Segun iti inisial nga inbestigasion dagiti polis, agpaamianan ti dyip a minaneho ni Cesario Eleccion, residente ti Barangay Cabaroan ditoy nga ili idinto nga agpaabagatan ti motorsiklo a minaneho ni Jojo Lagunte, residente iti Barangay San Pablo ditoy met laeng nga ili ket iti panagsabatda iti kalsada a sakup ti Barangay Bateria, mapapati a nasapgid ti dyip ti motorsiklo .

Naitaray ni Lagunte ken ti kaduana, ni Reynaldo Cacho, iti ospital tapno mataming ti sugatda.

Mapapati a nakainom ti drayber ti dyip.#