Motorsiklo, sinikuat dagiti mannanakaw iti Semana Santa

VIGAN CITY – Uray Semana Santa, di agbuteng dagiti awan kararuana nga agisayangkat iti dakes nga aramidda.

Nagpulong iti polis da Fastly Sanchez y Bocad, 15, natibo ti Manabo, Abra, ken ni Christian Jaric Ardaniel y Ancheta, 15, natibo iti Lapaz, Abra ken agpada nga aggigian iti Barangay Manangat, Caoayan, Ilocos Sur a natakaw ti nalabaga a Honda XRM a sinublatda iti ulitegda a naglugananda iti ipapanda ditoy siudad idi rabii ti Abril 5.

Segun dagiti dua,  imparkingda ti lugan agarup alas 9:00 ti rabii iti sanguanan ti maysa a pagmeriendaan iti Nueva Segovia Street, ditoy siudad,  sada napan iti pagbargainan iti Burgos Street.

Idi agsubli dagiti dua iti agarup 11:00 ti rabii, awanen ti lugan iti nakaiparkinganna.

Sinapul dagiti dua ti lugan ket idi dida mabirokan, inreportdan iti police station ditoy siudad.#