Agkabsat, nakasuan gapu iti carnapped a motorsiklo

STA. MARIA, Ilocos Sur – Gapu iti pannakatiliwda a nakalugan iti maysa a motorsiklo a mapapati a carnapped, nakasuan ti agkabsat iti korte itay  nabiit.

Sinaklangan dagiti polis da  Dandy Sumabat y Dang-alan, 28, ken ti kabsatna a ni Vic Sumabat, 16, agpada a residente iti Barangay Namaltugan, Sudipen, La Union, iti kaso a panagsalungasing iti Section 12 ti RA 6539 iti Regional Trial Court, Branch 25, Tagudin, Ilocos Sur gapu ta mapapati a carnapped ti motorsikloda.

Idi Septiembre 23, pinara dagiti polis bayat ti panagtsekpointda iti sango ti  munisipio ditoy nga ili, ti motorsiklo a nagluganan dagiti agkabsat.

Idi awan ti naipakita dagiti suspek a dokumento ti panagtagikuada iti motorsiklo, bineripika dagiti polis ti makina ken chassis number ti motorsiklo ket naduktalanda a tampered dagitoy.#