Footer

Motorsiklo ti retirado a polis, natakaw

VIGAN CITY – Nagreport iti police station ditoy ti maysa a retirado a polis a natakaw ti motorsiklona nga imparkingna iti sanguanan ti Girl Scout building, Barangay 1 idi rabii ti Septiembre 22.

Kinuna ni Isabelo Fermato, Jr. 61, naasawaan, retired PNP member ken residente iti Barangay Capangpangan, ditoy nga ili nga idi agarup 11:30 ti rabii ti Septiembre 22, intulodna babaen ti motorsiklo ti anakna a ni Zenita Fermato Mosico iti trabahona iti Girl Scout building, Barangay 1.

Iti mismo a sanguanan ti pasdek ti nangiparkingan ni Fermato iti motorsiklona.

Ngem idi agsubli ti biktima iti nakaiparkinganna iti luganna, awanen daytoy.

Kinuna ti polis a nakaidulin iti compartment ti paltogna a cal. 45 Norinco, addaan serial number 912871 nga agpasonto pay laeng no Oktubre 23, 2015 ken lisensiana iti nasao a paltog.

Nagsawar ti biktima ngem saannan a nasarakan ti motorsiklo isu nga inreportna laengen iti polis idi agsapa ti Septiembre 23.#