Motorsiklo ti trabahador, natakaw

STO. DOMINGO, Ilocos Sur – Pinanawanna ti motorsiklona iti sango ti maysa a balut stand sa napan nagtrabaho ngem idi agsubli, awanen ti luganna iti nakaiparkinganna.

Inreport iti polis ni Ian Jay Bautista y Racraquin, 24, baro, construction worker ken residente iti Barangay Cabigbigaan, a natakaw ti imparkingna a Honda Wave 100 a motorsiklona iti sango ti Paras Balut Stand idi agarup 1:00 ti malem ti Septiembre 7.

Kinuna ni Bautista a pinanawanna ti motorsiklona iti nadakamat a lugar sa napan nagtrabaho ngem idi agsubli iti agarup 4:00 ti dayta met la a malem, awanen ti luganna iti nakaiparkinganna.

Kinuna ni Bautista a pinanawanna ti lugan a nakatunnal ti tulbek iti ignition.

Ti adatna, saan nga ammo ti biktima ti chassis ken engine number ti motorsiklo agsipud ta awan ti naipakitana a resibo ken certificate of registration.

Agtultuloy ti panagimbestiga ti kapolisan ditoy no asino ti nangitaray iti motorsiklo ni Bautista.#