Motorsiklo, tinakaw nagpammarang a kusaomer

CANDON CITY – Nalipatan daytoy biktima nga inikkat ti tulbek ti motorsiklona idi imparkingna iti asideg ti tiendana ket idi nagbalaw, naitarayen ti di ammo a mannibrong ti luganna.

Inreport ni Arnel Gamueda y Collado, 40, negosiante, ken residente iti Barangay Paypayad, Candon City, iti polis a natakaw ti Honda Wave a motorsiklona bayat a nakaparking daytoy iti abay ti tiendana idi malem ti Agosto 17.

Mapattapatta a natakaw ti lugan idi agarup alas 4:00 ti malem ti nadakamat a petsa agsipud ta iti daytoy nga oras a nakangeg ni Gamueda iti umad-adayo nga ungor ti motorsiklo ket idi napanna kinita ti luganna, awanen daytoy iti nangiparkinganna.

Kinuna ni Gamueda a sakbay a napukaw ti motorsiklona, inasitgan ti maysa a lalaki a nakaiggem iti helmet ken naka-back pack ket nagdamdamag daytoy iti spare parts ti scooter.

Segun ken ni Gamueda, nakahelmet ken adda back pack ti lalaki a nakitana a nangitaray iti motorsiklona.#