SANTA, Ilocos Sur – Natay ti maysa a motorista ken ti kasakayna idi nakidinnungpar ti luganda iti maysa trak sadiay Barangay Magsaysay District ditoy nga ili idi malem ti Pebrero 22.
Pimmusay ni Danny Petilos y Sy, 36, awanan asawa, mangngalap, residente iti Barangay Pantoc, Narvacan, Ilocos Sur iti Gabriela Silang General Hospital idinto a pimmusay ni Ronaldo Casinio y Tejero, 45, naasawaan, mangngalap, kalugaranna, iti Ilocos Sur District Hospital gapu iti grabe a sugatda iti ulo.
Agpaabagatan ti motorsiklo a minaneho ni Petilos ket iti nagkurbaan ti nadakamat a barangay, nakidinnungpar iti kinasabatda a Hino truck a minaneho ni Cris Jay Emmanuel Paz y Buen, 25, awanan asawa ken residente iti Barangay Tay-ac, Bantay, Ilocos Sur.
Boluntario a simmuko ni Paz kadagiti nagresponde a polis ket naikustodia iti police station ditoy.#