Motorsiklo, traysikel, nagdinnungpar, 1 natay

CANDON CITY – Natay ti nagmaneho iti motorsiklo idinto a nasugatan dagiti insakayna idi nakidinnungpar ti luganda iti maysa a traysikel iti national highway a sakup ti Barangay San Jose ditoy siudad idi Nobiembre 2.

Natay ni Vincent Maranion, 21, residente iti Barangay Tamurong 1st, idinto a nasugatan dagiti inluganna a da Kevin Andaya ken Mariano Pascua, kalugaranna.

Nasugatan met ti drayber ti traysikel a SYM a ni Alexander Ferrer, 21, residente met iti nasao a barangay.

Naammuan iti inbestigasion nga agpaamianan ti traysikel idinto nga agpaabagatan ti Honda Wave ngem mapapati a nagsabatda a nagdinnungpar iti tengnga ti kalsada a puon ti nakatayan a dagus ni Maranion ken nakaro a nakasugatan dagiti kaduana.

Mapapati a nakainom dagiti biktima idi mapasamak ti aksidente.#