Footer

Mulmula, naitukit iti Candon watershed

CANDON CITY – Nadumaduma a kita ti mula ti naitukit iti watershed ditoy  tapno agtultuloy a maparangen ti kabambantayan kas paset ti programa ti gobierno ti siudad a panangsaluad iti aglawlaw.

Naammuan ken ni city agriculturist Elmor Leano nga iti napalabas a Fiesta ti Bantay, saan laeng dagiti taga-Candon no di uray dagiti nadumaduma nga asosasion ken departamento ti nagmula iti watershed.

Agdagup iti 1,000 a grafted a kayo manipud iti Department of Agriculture, 100 a seednuts manipud iti Philippine Coconut Authority, 3,000 a mahogany manipud iti Deparment of Environment and Natural Resources, 25 a blackpepper, 500 nga ubi ken tugi ken 500 a tissue-cultured a saba ti naimula ti watershed.

Nainayon dagitoy kadagiti sigud a naimula iti nasao a watershed area a maysa itan a napintas nga eco-tourism area. (Danny Antalan)