Multi-awarded a kooperatiba, selebraranna maika-20 nga anibersariona

CANDON CITY – Selebraran ti Paypayad Multi-Purpose Cooperative iti mabiit ti maika-20 nga anibersariona kalpasan ti panangangayna iti maysa a general assembly ken pannakabutos dagiti kabarbaro a kameng ti hunta direktiba itay Marso 5.

Kinuna ni MeloDizon, general manager ti kooperatiba, a nangrugi laeng ti kooperatiba iti 22 a kameng ken P11,500 a a puonan ngem itan, addan 451 a kameng ti kooperatiba manipud iti nadumaduma a barangay ti siudad ket addaanen iti P2.5 million a share capital ken P12 million a total assets.

Idi parambak ti Kannawidan Ylocos Festival, naital-o ti Paypayad Multi-Purpose Cooperative a Hall of Famer kalpasan nga inyalatna iti maikatlo a gundaway ti pammadayaw kas most outstanding cooperative iti probinsia iti napalabas a SIGLAT Awards.#