Multi-level a pagparkingan, ipasdek ti Vigan City government

VIGAN CITY – Tapno maikkatan ti problema ti trapiko ditoy siudad, panggep ti gobierno ditoy ti mangipasdek iti pagparkingan dagiti lugan iti dati a tiendaan.

Iti agdama ket adda dagiti pagtagilakuan iti dati a tiendaan publiko iti Quezon Avenue ken maar-aramat a parkingan iti tengngana.

Ngem kinuna ni Mayor Eva Marie S. Medina a nupay maar-aramat a pagparkingan ti tengnga ti dati a tiendaan iti Quezon Avenue, saan unay a ma-maximize agsipud ta nagbassit ti areana isu a napanunotda ti mangipatakder iti multi-level parking area ditoy.

Innayonna a saan unay a nangato ti multi-level parking area ta agpatingga laeng iti tallo wenno uppat a kadsaaran.

Problema ti trapiko ditoy siudad gapu iti kinakipet dagiti kalsada iti baet nga umad-adu dagiti lugan a sumsumrek ditoy a pakairamanan dagiti bus, van, motorsiklo, dyipni, traysikel ken kalesa.#