Multi-level parking a pasdek, mabangon

VIGAN CITY – Natubtoben dagiti pasdek-negosio iti daan a tiendaan ditoy tapno mabangon ti multi-level a parkingan dagiti lugan tapno maalay-ayan ti nakaro a trapiko iti puseg ti siudad.

Kinuna ni Mayor Eva Marie S. Medina a nalpasen ti proseso ti bidding ket addan napili a developer a mangbangon iti multi-level parking a pasdek.

Sakbayna, inikkan ti sangguniang panlungsod ni Mayor Eva Marie S. Medina a sumrek iti katulagan iti developer a mangbangon iti multi-level a parking a pasdek.

Kinuna ni Medina a dimmawat ti developer iti plaso a saan nga agbayad iti upa iti makatawen ket gudua bayat a mabangon iti multi-level parking a pasdek.

No malpas ti lima-kadsaaran a pasdek, agbalin a puesto dagiti pagtagilakuan ti umuna ken maikadua a kadsaaran, idinto a pagparkingan iti lugan iti maikatlo agingga iti maikalima a kadsaaran.

Problema dagiti agtuturay ti nakaro a trapiko nangruna itan ta immadu dagiti agpasiar a turista ditoy siudad kalpasan a napili daytoy a maysa kadagiti pito a baro a pagsiddaawan a siudad iti lubong. #