Footer

Multiline, imanehar ti pribado a kompania

SANTA, Ilocos Sur – Saanen a ti gobierno probinsial ti mangmanehar iti food processing plant ditoy no di maysan a pribado a kompania.

Segun ken ni Gov. Deogracias Victor Savellano, saan a kas iti immun- una a panagtaray ti planta a ti gobierno probinsial ti aggasto, ti International Business Association Inc. (IBA) manipud Italia itan ti mangmanehar iti operasion ti Multiline Food Processing Plant. Naammuan iti gobernador nga upaan ti IBA ti planta iti  P100,000 .

“Karaman a naipalaon iti nagpinnirmaan a memorandum of agreement a prioridad ti pannakaala nga empleado dagiti taga-Ilocos Sur, isu a makatulong daytoy iti pannakakissay ti unemployment rate ditoy probinsia,” kinuna ni Savellano bayat ti press conference a naangay kalpasan ti programa ti pannakalukat manen ti nasao a planta idi Disiembre 11.

Kabayatanna, kinuna ni Santa Mayor Jeremy Jesus “JJ” Bueno III a dakkel a tulong iti ilina ti pannakalukat manen ti nasao a planta gapu ta dumakkel ti koleksionda iti buis.

“Adda paset daytoy a pakailakuanto dagiti kanginaan a produktomi kas iti ubas, buneng, ipon ken dadduma pay. Malaksid iti dayta, masursuruan pay dagiti agindeg iti kabaruan a wagas ti panagmula babaen ti isuroda nga Italian farming,” kinuna ni Bueno.

Kinuna met ni IBA President Orlando Marino a karaman ti operasion ti Multiline ti panagparti ken panagproseso iti baboy, baka ken manok, pannakailukat ti 24-hour restaurant ken convinience store a mangisagana iti Italian cuisine kas  iti pizza ken Italian sausage nupay agtuloy met latta ti Ilocos longgganisa.

Kinuna ni Marino nga iyur- uray metten ti IBA dagiti makinaria manipud iti Italia para iti panagproseso iti keso a planoda nga irugi iti 2009.

Innayonna nga agpamulada pay iti aganay 50 ektaria para iti Italian ken Filipino varieties ti kamatis ken sili babaen ti pannakausar ti Italian technology iti irigasion ken panagmula. Maproseso kas dried vegetables dagiti maapit.

“Im-imbitarak dagiti agtartaraken iti baboy, baka ken manok nga umayda ilako kadakami dagiti produktoda ket ipasiguradomi met a cash on delivery (COD) ti  pannakabayad dagitoy,” kinuna ni Marino.#