Municipal assessor, nasipdutan iti kuarta iti mall

VIGAN CITY- Taga-Dean Leopoldo Yabes, Sinait, Ilocos Sur manen dagiti suspek a nangsipdut iti kuarta ti maysa a municipal assessor bayat ti kaaddana iti maysa a pagtagilakuan ditoy siudad idi malem ti Nobiembre 4.

Nasipdut ti sumurok kumurang P28,000.00 a kuarta, ken assorted IDs ni Lyn Valentin y Cudao, 43, awanan asawana, municipal assessor, ken residente iti Poblacion, Sugpon, Ilocos Sur bayat ti kaaddana ken dagiti gagayyemna iti Mendrez Store, maysa kadagiti pagtagilakuan iti Plaza Maestro complex iti dayta a malem.

Segun ken Valentin, sakbay a naduktalanna nga awanen ti kuartana, maysa a grupo dagiti babbai ken maysa a bakla ti limmabas iti yanda.

Nabigbig ti dua kadagiti babbai a da Rosemarie Villanueva ken Grace Talania, agpada a residente iti Barangay Dean Leopoldo Yabes (dati a Pug-os), Sinait, Ilocos Sur. Nainbolbaren dagitoy suspek iti panagsipdut wenno panagtakaw iti kallabes. Nalatak met ti DLY, Sinait nga apon dagiti mannipdut iti probinsia.

Nangisayangkat ti polis-Vigan babaen ti koordinasion ti Sinait police station, iti pursuit operation ngem saanda a nasapulan dagiti suspek iti residensiada iti DLY.

Nupay kasta, babaen ti tulong ti maysa nga impormante, nakontak dagiti polis dagiti kabagian dagiti suspek ket dagitoy ti nangkontak kada Villanueva ken Talania para iti pannakaisubli ti nasipdut ken ni Valentin.

Babaen ti impormasion manipud kadagiti kabagian dagiti suspek, natuntonan dagiti polis ti wallet ni Valentin iti likud ti pagbasuraan sadiay JTC Mall, Balaleng, Bantay, Ilocos Sur.

Babaen pay ti negosasion ti kapolisan kadagiti suspek, napasubli ti kuarta ni Valentin ngem agkurangen daytoy.

Mapapati a P19,000.00 laengen ti dagup ti kuarta ni Valentin a narekobre dagiti polis iti asideg ti residensia dagiti suspek.

Sinapul dagiti polis dagiti suspek ngem saanda a nabirokan dagitoy.#