Murder, panaglabsing iti RA 10591 ken RA 9165 naikaso nanggudas 2 internet installers

BANTAY, Ilocos Sur – Nupay saan pay a masinunuo no ania ti nakagapu iti pannakapapatay iti dua nga agin-instolar iti internet connection sadiay Barangay Balaleng Amianance, ditoy nga ili idi malem ti Abril 17, ibilang ti kapolisan ditoy a nasolbaren ti kaso iti pannakaaresto ti suspek kalpasan ti pannakarekobreda iti paltog a naaramat iti krimen.

Iti progress report ti Bantay Police Station a naipatulod iti Provincial Police Office, nayendorson ti kaso a murder (two counts), panaglabsing iti RA 10591 ken RA 9165 maikontra iti suspek a maysa a Rodel Pizarro y Pacpaco, 39, naasawaan, ken residente iti Barangay Balaleng Amianance, Bantay, Ilocos Sur.

Idi agarup 4:25 ti malem ti nadakamat a petsa, naireport a napaltogan da Hitler Oliquino y Asistin, 32, ken John Rosqueta y Altona, 50, agpada nga installer iti internet connection ti PLDT, ken residente iti Sitio Limmansangan, Barangay Margaay, Narvacan, Ilocos Sur.

Segun iti report, napan da Oliquino, Rosqueta ken ni Jeff-jeff Rosqueta y Cabatang, anak ni John, iti balay ti maysa a Virginia Robillon y Rabbon tapno simpaenda ti internet connection daytoy.

Ni laeng Jeff-jeff ti simrek iti balay idinto a naggian iti ruar dagiti biktima.

Bayat ti panangsimpa ni Jeff-jeff iti koneksion ti internet, nakangeg iti nagsasaruno a kanalbuong ket nakitana laengen ti amana ken ni Oliquino a napasag a nakapakleb.

Naitaray dagiti biktima iti Metro Vigan Cooperative Hospital ngem naideklara a natayen ni Oliquino. Pimmusay met ni Rosqueta bayat ti operasionna.

Nakarekobre ti SOCO team iti pito a naiputok a cartridge cases ti Cal. 5.56mm iti nakapasamakan ti krimen.

Nadatngan pay laeng dagiti nagresponde a polis ni Pizarro a nakaiggem iti bolo iti bisinidad ti nakapasamakan ti pammaltog ket idi rinikisada, nasukalan iti ikutna ti maysa a totter, selpon a Nokia, tulbek ken 12 nga stick ti nalabaga a Marlboro a sigarilio a naikabil iti pakete.

Mapapati nga impudno ni Pizarro bayat ti pannakapalutpotna nga inlemmengna ti inaramatna a paltog nga M16 Armalite rifle iti balay ni Marlito Paet y Carpio, maysa a barangay tanod.

Kinumpiska dagiti polis ti nasao a paltog iti balay ti tanod.

Nasukainan pay iti balay ti suspek iti dua a magasin para iti M16 a nagkarga iti 51 a bala para iti 5.56 cal.

Kabigatanna, idi agarup 2:00 ti malem, impaima da Barangay Captain Edwin Pilar ken ni Marlito Paet iti police station ti maysa a long magazine a nagkarga iti 14 a bala para iti cal. 5.56 mm.

Mapapati a nadiskubre ti agtawen iti siam nga anak ni Paet ti magazine ket ni met laeng Pizarro ti maatap a nangisuksok iti plastic disc dispenser.#