Murder, robbery, arson case kontra 3 kameng ti militante a grupo, winaswas ti korte

CANDON CITY – Winaswas ti korte ditoy ti kaso a robbery with arson ken murder mainaig iti pannakauram ti estasion ti polis iti Sta. Lucia, Ilocos Sur maikontra iti tallo a kameng ti maysa a militante a grupo.

Dinismis ni Judge Policarpio Martinez ti Regional Trial Court Branch 71 ditoy ti kaso a two counts of murder, robbery  ken arson maikontra kada Julian Dawa, taga-Sta. Cruz, Ilocos Sur; Leonardo Sabalo, taga-Narvacan, Ilocos Sur; ken Rogelio Vilog, taga-Sta. Lucia, Ilocos Sur gapu iti kinakurang dagiti ebidensia maikontra kadakuada.

Napabasol da Dawa, Sabalo ken Vilog a karaman iti pannakauram ti estasion ti polis idi 2003.

Inlawlawag ni Atty. Robert Tudayan, nagtakder a defense counsel dagiti akusado, a dinawatna ti  sigida a pangngeddeng ti presiding judge agsipud ta iti cross examination iti saksi ti prosekusion, inannugotda a saanda a matudo a nalawag dagiti akusado nga isuda ti akin-aramid iti nasao a pananguram iti police station ti Santa Lucia.

Kinuna dagiti akusado a bindikasion kadakuada ti  pangngeddeng ti korte nga  inosenteda iti naipabasol  kadakuada.

Iti interview ti DZTP Radio Tirad Pass kadakuada, dinakamat da Dawa, Sabalo ken Vilog a ninamnamada ti not guilty verdict agsipud ta dida inaramid ti nasao a pammabasol kadakuada. 

Innayonda nga itultuloyda ketdi ti panangilabanda kadagiti karbengan dagiti mannalon nangruna ita a tiempo manen ti panaggiirik.

Maipalagip nga idi Hulio daytoy a tawen, boluntario a simmuko da Dawa, Sabalo ken Vilog iti korte ditoy kalpasan a naitudoda a responsible iti pannakauram ti estasion ti polis iti Santa Lucia.

Kinuna dagiti tallo nga imparangda ti bagbagida iti RTC Branch 71 iti sala ni Judge Martinez tapno mapaneknekan nga awan ti pakainaiganda iti pasamak.

Maipalagip pay a temporario a nadeteneda iti Provincial Jail bayat a madengdengeg ti kasoda.

    Nasurok met a sangagasut ti nagatendar ken nangimatang iti panakaiparuar iti decision kadagiti tallo.

    Kalpasan a rimmuar ti decision, nagturongda iti plaza ket nangisayangkatda iti rally a kas pananglagip met iti Martial Law ta nairana a Septiembre 21 ti pannakadalus iti naganda.#