Mutia ti Tagudin ti nangabak a Miss Saniata ti Ilocos Sur

VIGAN CITY – Ti mutia ti Tagudin, Ilocos Sur, ni Miss Patricia Francisco, ngem agnaeden iti Malasiqui, Pangasinan ti napili a Miss Saniata ti Ilocos Sur iti beauty pageant a naangay itay Pebrero 2 iti provincial capitol ditoy.

Kas gunggonana, immawat ni Francisco iti P50,000 ken ibagianna ti Ilocos Sur iti sumaruno a Binibining Pilipinas Pageant.

Napili met ni Rolyn Michelle Sanchez, taga-Tagudin, Ilocos Sur met laeng, a Saniata ti Ilocos Sur Tourism ket irepresentarna ti probinsia iti sumaruno a Mutya ng Pilipinas Pageant; ken ni Diana Viray, mutia ti Cabugao, Ilocos Sur  kas Saniata ti Ilocos Sur Environment ket ibagianna ti Ilocos Sur iti sumaruno a Miss Philippines Earth.

First Runner-up ni Roselle Anne Torres ken Second Runner Up ni Donatella de Vera, agpada a taga-Vigan City.

“I’m very surprised. I didn’t expect na ako ang mananalo,” inyisem ni Francisco sumagmamano a kanito kalpasan a nakoronaan a Miss Saniata ti Ilocos Sur.

Innayonna a maragsakan a mangibagi iti Ilocos Sur iti Binibining Pilipinas contest.

Agdagup iti 20 dagiti kandidata a naggapu iti nadumaduma nga ili iti probinsia.

Hectic ti iskediul dagiti kandidata bayat ti pannakarambak ti Kannawidan Ylocos Festival manipud Enero 27 agingga iti Pebrero 3 iti daytoy a tawen.

Kalpasan a naipresentar dagiti kandidata idi Enero 26 kadagiti kameng ti media, nakipartisiparda iti libut kalpasan ti nadaeg a misa iti Katedral ni San Pablo iti sardam ti Enero 27, nagpabuyada kas panangipamatmatda iti talentoda iti karabian ti Enero 28 sumagmamano nga oras kalpasan ti pannakaipresentarda kadagiti tattao sakbay ti pannakaipabuya dagiti traditional ken ethnic a salsala dagiti nagkauna nga Ilokano ken tribtribu iti kabambantayan ti Ilocos. Pinasiarda ti Bantay bell tower iti Bantay, ti Vigan Heritage Village, Baluarte ken nadumaduma a beach resorts iti Ilocos Sur kas paset ti panangitandudoda iti turismoti probinsia.

Dagiti sumaganad dagiti nangabak iti special prizes: Angela Luz Abualatta, taga-Capangpangan, Vigan City – Miss Congeniality; Maricel Manzano, Candon City – Miss Photogenic; Media’s Choice ni Patricia Francisco; Best in Swimsuit ni Cherry Ann Kubota ti Sta. Maria; Miss Talent ni Robyn Michelle Tuttle; Ilocano’s Choice ni Roselle Anne Torres; ken Best in Formal Attire ni Diana Viray.

Dagiti nagpaay a hurado: national designer Rene Salud ken former beauty queens Carlene Aguilar, Rica Taylor ken Abby Cruz.#