Na-Covid ni Antokoy (Maudi a paset)

Nanglukat a dagus iti nakalamlamiis a red horse ni Godo apaman a nakalas-ud iti paraanganda ni Antokoy. Adda metten kaliente a pulutan a nakaparabaw iti bassit a lamiseta. Imbes a lamano, inyawat a dagus daytoy ti bote ti beer ken ni Antokoy a dagus met a nangitanguap iti daytoy. Inimasna ti lamiis ti beer a dimmalan iti karabukobna.

“Ania kumpad nakasaganakan?” inamadna iti kagawad a kompadrena.

“Wen a kumpad. Ala i-shot ta ketdi ta eksaktonto no madamdama” insungbat ni Godo.

“Nasayaat man ta nakaalada iti permitda nga agpasugal ket nakaing-inget dagiti pulis sipud adda dayta Covid.” Inamad ni Antokoy.

“Ania ketdin aya kumpad kasla la dika ammo met a tay kapitanda dita Cabangligan ti little mayor ti ilitayo. Nakatimbre daytan. Awanton agronda a pulis uray pupuotem” inkatawa ni Godo.

Alas nueben iti masangal ti Lucky Nine. Ni Antokoy ti nagtugaw iti puesto ti bangkero ket adda iti abayna ni Godo. Maysa a kagawad iti kabangibang a barangay ti adda iti kanigid. Taga kabangibang nga ili iti kannawan idinto a taga dumaya a paset ti ili ti adda iti sango. Kaaduan kadagitoy ti pada ni Antokoy a saan a naka-facemask.

Pinintadaan ni Antokoy ti baraha idinto a matiritir ti tengnged ni Godo a mangsirsirig. Singko ti adda iti rabaw. Inin-inutna a pinalabsan ti akin-uneg. Tinengngelna ti angesna. No kuatro daytoy akuyennan amin a kuarta iti lamisaan. Ngem no nagkibaltang ket singko daytoy agdadatan a buhaw. Inamad ti para waras no i-hits na. Maminsan pay pinintadaanna ti iggemna a baraha ket napasul-oy idi kuatro ti maikadua. Napaisem ni Antokoy idi i-ipanen ti kueme dagiti inabakda iti batogna kalpasan a naikissayna dagiti tong.

“Suerte.” Inkatek ti panunotna. Kimpet ni gasat iti saanna a panangtutop iti panagsaosao ni baketna itay rumuar. Nagtuloy ti sugal agingga nga agligsayen ti rabii. Talaga a nagasat ti bangka. In-inut a rimmasay dagiti paspasurot. Naibusen ti kuarta ti adda iti kanigid idinto nga iggemen ni Antokoy ti tulbek ti motor ti taga kabangibang nga ili. Nakagaygayad ti isem ni Godo bayat ti panagurnosda kadagiti nagtitipon a nasisikkil kada rutrot a papel de bangko. Impisokda met dagiti selsilio iti bassit a bag. Sakbay ti ipapanawda iti natayan nangilasin ni Antokoy iti nabukel a sangaribu ket inyawatna iti balo a mangbambantay iti lungon idi agpakadadan. Sumagmamano pay a kanito un-unurendan ti kalsada nga agturong iti balay da Godo a pangbingayanda iti inabakda. Saggaysadan iti lugan ta sinakayanen ti kagawad ti naisalda a motor.

Naladaw a nagriing ni Antokoy iti sumuno nga agsapa. Medio nakarikna iti gagatel ti karabukobna idinto a kasla makapampanatengen. Nagdiretso iti banio tapno agdiram-os. Kalpasan ti panammigatna, nagsubli met laeng iti iddana. Pagarupenna a naikawa iti pannakalinnaawna sa pay la nagsalemsemen itay agawidda ken kumpadrena. Malpas pangngaldawen idi makariing manen. Nalag-anen ti bagina. Sinakayanna ti motorna ket napan iti igid ti baybay tapno kitaenna no adda naala dagiti mangngalap. Nadanonna dita dagiti padana nga agang-angkat. Ngem nadismaya idi makasangpet dagiti naggapu iti taaw. Nakurang pay a bente kilos ti nakalapanda. Impabus-oynan kadagiti umariwawa a babbai ket saanen a nakibagi. Intarengtengnan ti napan iti nakaiparkingan ti luganna ket nagdiretson iti tiendaan. Gapu ta nawadwad ti bingayna iti inabakda idi rabii, naggatangen iti masapsapulda. Linikusna dagiti paglakuan iti karne, ikan ken nateng sa dimmagas iti groseria tapno gumatang iti abasto dagiti putotna. Kaan a kaan ngamin dagitoy iti sitsiria bayat ti panangsungbatda kadagiti moduleda. Idi rumuaren daytoy iti groseria nakitana ni Dorot nga agpatpataya iti hueteng. Pinayapayanna daytoy.

“Ipanmo man ti tres bente.” Kinunana bayat ti panangiyawatna iti sangagasut a pisos.

Iti panagawidna dimmagas iti dua bukel a balut iti aglaklako iti krosing.

Gapu iti kinaanginna awan manen ti napan nagkalap iti sumagmamano nga aldaw. Kabuteng ngamin dagiti mangngalap ti makigasanggasat iti taaw ta kastoy a panawen no adda dagiti maiwawa a mangngalap a nangipilit a mapan agkalap. Sumagmamano ti saanen a nakasubli. Ad-adda ngarud a ti makitienda ti ar-aramiden ni Antokoy. Napanna pay imbangko ti dadduma nga inabakna tapno saanna a magastos. Iti malem mapan met makiinninum iti balay da Godo. Dina latta ingginggina ti panateng ken agsaprid a karabukobna agingga a kasapulan manen nga ag-antigen test tapno makapan iti kabangibang a probinsia. Sitatalek latta ni Antokoy a napanen iti ospital tapno agpaeksamen. Ket anian a pannakaaliawna idi rumuar ti resulta. Positibo iti Covid.

Dagus a napakaamuan dagiti taga RHU ket dagus a naisolate ni Antokoy. Insigida nga insayangkatda ti swab test. Maysa a contract tracer ti nangsaludsod kenkuana no sadino dagiti napnapananna iti napalabas a makalawas. Kasta unay a ngilangil daytoy idi saggaysaenna nga ibaga dagiti napananna.

Agingga iti malem nagsasarunon a nagsangpet dagiti possible a contacts-na. Karaman ditoy ni baketna ken dagiti annakda a kasta unayen ti kusilapda kenkuana. Kayatna ti lumned koma iti ayanna ta siguraduenna ti panagmasingan ti ngiwat ti asawana. Intugawna iti suli ket nangrugi a kinelkel iti uyek.