Naabak iti tadi, peke a kuarta ti pinagbayadna

CANDON CITY – Peke a kuarta ti pinagbayad daytoy a lalaki idi naabak ti pinustaanna a manok iti pagpallotan ditoy siudad.

Inaresto dagiti polis ni Cresencio Cariaga, 54, residente iti Barangay Madupayas, Badoc, Ilocos Norte gapu ta nasukalan a peke dagiti kuarta a pinagbayadna kalpasan a naabak ti manok a pinustaanna iti galiera ditoy.

Naala iti ikut ni Cariaga dagiti peke a P500 nga addaan serial numbers BT989221, CH716170, DD016912, GX484953, ken PD691287, ken maysa a P1,000 nga addaan serial number SZ704870.

Mapapati a dinangran dagiti di nabigbig a mammallot ni Cariaga idi maduktalan a nagbayad daytoy iti peke a kuarta.#