BANTAY, Ilocos Sur – Narekobre ti akinkukua ti motorsiklona nga imparking ken pinanawan ti maysa a lalaki iti maysa a garahe iti Barangay Bulag ditoy nga ili idi rabii ti Hunio 30.
Segun kada Elpidio Paa y Supnet ken Edison Paa y Mendoza, nakitada laengen ti Racal 125 motorcycle a nakaparking iti garaheda iti dayta a rabii. Idi awan nangsubli iti motorsiklo, inreportdan iti polis.
Napan tinunton ni Victor Anicas y Petate, 22, naasawaan, drayber ken residente iti Barangay Cabalanggan, kaduana ni Ferdinand Gadut y Molina, 29, credit and collection supervisor ti RacalMotorcycle Company ti nasao a motorsiklo.
Pinaneknekan ni Gadut a kukua ni Anicas ti motorsiklo ket inyutangna daytoy idi Pebrero 17, 2015 a baybayadanna ti P1,490.00 monthly amortization.
Saan pay nga ammo ti kinasiasino ti lalaki a nangibati iti nasao a motorsiklo iti garahe dagiti ag-Paa.##