Naabandona a traysikel, narekobre

BANTAY, Ilocos Sur – Tallo nga aldaw kalpasan ti pannakaireport ti maysa a motorsiklo a naabandonar iti maysa a barangay ditoy nga ili, nagparang iti polis ti maysa a lalaki ket imbagana nga isu ti akinkukua iti nasao a lugan.

Nagparang iti police station ni Mark Gil Berdolaga Pakino, 26, naasawaan, ken residente iti Maglaoi Sur, Currimao, Ilocos Norte idi agarup 3:30 ti malem ti Septiembre 24 ket tinuntonna a kukuana ti Euro motorcycle (skeleton) nga addaan Chassis No. LF3XCGOA17A003679, Engine No. IP50FMG 71104870 ken Plate No. 2402-EO.

Segun ken ni Berdolaga,   pinanawanna ti traysikel a naka-locked iti Via Crusis St., Zone 5, Bantay, gapu iti mechanical problem.

Maysa a Gener Ronquillo y Tobias ti nangireport a nakitana ti motorsiklo a naabandonar iti nadakamat a lugar idi Septiembre 21.

Inted dagiti polis ti motorsiklo ken ni Berdolaga kalpasan nga imparangna dagiti dokumento a mangpaneknek nga isu ti akinkukua iti lugan.#