Footer

Naammuan, nangabak iti salip iti sarita ti AMMAFLA

Inyalat ni Mark Anthony T. Ganotice, 23,  ti Brgy. Dagueray, Sanchez Mira, Cagayan ti umuna a gunggona iti Salip iti Sarita para kadagiti Agdadamo a Mannurat ti 12th AMMA Foundation Literary Awards, daytoy ti impakaammo ti AMMAFLA secretariat.

Umawat ni Ganotice iti P10,000.00 ken sertipiko ti pammigbig iti panangabak ti saritana nga “Anak ti Gatel” iti grand prize. Agtrabtrabaho ni Ganotice a liaison officer ken janitor iti maysa a nursing review center iti Kamanilaan.

Ni met Salustiano A. Digaoan, 78, kontratista ti mabangon a balbalay ken agnaed iti San Fernando City, La Union ti nangabak iti maikadua a gunggona (P8,500.00 ken sertipiko ti pammigbig) babaen ti saritana a “Batibat”.

Maikatlo a gunggona ni Avelino B. Felicitas, Jr., 60, ti Bangued, Abra ken Santa Maria, Ilocos Sur ngem agnaeden ken ti kaingungotna iti 94-1063 Halelehua St., Waipahu, Hawaii, babaen ti saritana a “Zita F. Imperial, CAN” (P7,000.00 ken sertipiko ti pammigbig). Nagretiro a professor iti University of Northern Philippines, Vigan City; agpapaay ita a substitute teacher iti Leeward School District, Oahu, Hawaii ken security officer iti UPS Facility, Honolulu International Airport babaen ti ALI’I Security System.

Nagpaay a hurado da Nilo S. Dumlao ti National Commission for Culture and the Arts, chairman; Juan Al. Asuncion, Literary Editor ti Bannawag, kameng; ken Ariel S. Tabag, Entertainment Editor ti Bannawag, kameng.

Dagiti nangimaton iti AMMAFLA: Alfredo ken Cherry Quibol; Francisco ken Aurora Ponce; Amado ken Gloria Yoro, Mike Ulibas, ken Mario Orbito.

Dagiti nagidonar iti cash prizes: M/M Francisco /Aurora Ponce (1st prize);  M/M Alfred/Cherry Quibol (2nd prize), ken M/M Amado/Gloria Yoro (3rd prize).

Maipaayanto pay dagiti nangabak iti saggaysada a baro a libro dagiti dandaniw nga impablaak ti GUMIL Filipinas, ti “Kastoy nga Imbunubonmi dagiti Balikas”.

Mapadayawan dagiti mangabak iti rabii ti Abril 9, 2010 bayat ti Maika-42 a Kombension Nasional ti GUMIL Filipinas a maangay iti Pangil Beach Resort, Currimao, Ilocos Norte.#